E ai ki te Māori, mai anō i a Māui Pōtiki, kua tapahia e te pouaru, e te kirimate, ngō rātou makawe i te tangihanga. He reureu, he tiotio, he pakipaki taha ngētehi o ngā tohu weriweri nei, i tauawhi, i whakaū i te aroha ki te mate. I ngētehi wā, he whakamaumahara, he take whakariri i te ngākau, he utu i te tangi kino o te manawa. Mutu kau ana te tangihanga, ko te heuenga hoki i te whare tauā, ki te wai whakaika. Ko ngētehi take ngēnei o te tapahi makawe a te kirimate, otirā, ko te tino whāinga o tēnei tuhinga whakapae. He whakapono makawe anō i whakaemingia, nā te rangahau mātātuhi, ko ngā pūrākau, ngā mōteatea, ngā whakataukī anō hoki a ngā tūpuna. He tirohanga kaumātua i kohikohingia nā roto mai o te uiui. Waiho mai ana ko ngā tikanga tawhito mō te tapahi i te uru tapu o te tangata, ki te ao tūroa.