He Whakaemi Kōrero mō Ngā Ruahine

Abstract

Ko te whāinga o tēnei tuhingaroa, hei whakaemi kōrero mō Ngā Ruahine. I whāia e au te āhua o te tipu o te rākau hei hanga i aku kōhinga kōrero mō Ngā Ruahine. Ko te ūpoko tuatahi, ko ngā pakiaka, arā te tīmatatanga o Ngā Ruahine. I konei ka tirohia ngā kōrero mō ngā waka tawhito mete whakapapa hoki o ngā tūpuna tāngatawhenua o Ngā Ruahine. Whai muri i tēnā, he wāhanga e pā ana ki te haeretanga mai o Aotea waka, ā, ka tirohia hoki tētehi kōrero tawhito mō te wehenga o ngā iwi o Aotea. Mai i ngā pakiaka ka piki ake ki te tinana o te rākau. Koinei te wāhanga e pā ana ki ngā korero whenua o Ngā Ruahine. Kei te ūpoko tuarua nei, ka āta tirohia ngā kōrero mō ngā tongi o te rohe o Ngā Ruahine, me ngā take kōrero e whakawhanaunga ana i te tangata ki te whenua. Kei te ūpoko tuarua anō hoki ētehi whakaaturanga whenua mō te rohe o Ngā Ruahine, hei āwhina i te kaipānui. Mai i te tinana, ka aro atu ki ngā peka o te rākau i raro i te ūpoko tuatoru. Koinei te wāhanga nui o tēnei tuhingaroa, nā te tokomaha o ngā toronga o ngā peka nei. I roto i te ūpoko tuatoru, ka tirohia ētehi kōrero mō ia hapū o Ngā Ruahine. Mai i ngā kōrero mō ngā rohe whenua o ia hapū, ki ngā kōrero mō ngā marae me ngā pā tawhito o ērā hapū, ā, tae atu hoki ki ngā tūpuna rongonui me ā rātou mahi whakaari. Hei te mutunga, ka herea katoatia ngā kōrero o te tuhinga nei i raro i te ūpoko tuawhā, kia kite ai , he aha ngā hua e pūawai ai i tēnei tuhinga. Koinei te whakamutunga o ngā kōrero, arā ko te whakakapīnga o ngā kōrero. Ko tēnei tuhingaroa, he whakaemi kōrero mai i ngā kaumātua o Ngā Ruahine, ā, he mea tango mai hoki ētehi kōrero i ngā pukapuka, ko ēnei kōrero kua whakatakotoria i roto i tēnei tuhingaroa hei whakawhāriki iho ki te aroaro o te tini. Ko te tūmanako, he tuhinga rangahau tēnei hei āwhina i ngā rangatahi o Ngā Ruahine, kia rongo ai rātou i ngā kōrero kāore i te tino rangona i ēnei rā, kia mau hoki ngā kōrero a ngā kaumātua o Ngā Ruahine, kei ngaro. Erangi, he whakamōhio tēnei, he tīmatanga anahe tēnei tuhingaroa mō te kaupapa nei. Ko te tūmanako, he hua anō ka puta i tēnei rangahau, hei whāngai i ngā manu hiakai o Ngā Ruahine.