Ngā Ia Nōnoke

Abstract

Tā tēnei tuhinga, he titiro ki ngā kōrero onamata mō ngā mahi nōnoke a te Māori. I mua, whāia ai te nōnoke e ētehi hapori Māori hei koringa tinana, hei tū hākinakina, hei tākaro hoki. Ko te nōnoke, te whātōtō, te taitai me te mamau, he rite katoa. Nō te kuhutanga mai o ngā tini whakaawenga a tauiwi, ka nui hoki te Māori i tahuri ki hākinakina kē. Nāwhai ā ka mimiti te whāia o te nōnoke. Kei tēnei tuhinga, ka āta wetekina ngā kupu me ngā kōrero o te reo nōnoke o mua, arā ngā tohutohu a ngā pāhake e whakaahua ana i ngā tūmomo neke, i ngā whiu me ngā puringa mahia ai e te kaiwhātōtō. Ka arohaehaetia tēnei mea te karakia, te waiata me te pepeha kia kuhuna ai te hinengaro o te kaiwhātōtō e mārama rawa ai te ia o ōna whakaaro, tōna waiaro me tōna whanonga. Waihoki ko ngā pūrākau o mua, kua whakaemia ētehi tauira kia tīroua ngā karere i whaona ki roto. Ko te tino whāinga, ko te whera i ngā rangahau nei kia āta mōhio ki ngā koronga me ngā horopaki whāia ai e te Māori o mua ngā mahi nōnoke.