Abstract
Mai anoo, mai anoo i te waa o ngoo taatou tuupuna, ko te iere o te reo, ko te tangi o te kupu te waka kawe i ngaa whakaaro me ngaa kare aa-roto o oo taatou tuupuna. Inaa hoki raa te hoohonu o te whakaaro me te huhua o ngaa kura huna kua rarau ki ngaa kupu tuku iho o oo taatou tuupuna. I roto i a maatou, o Tainui waka, o Waikato iwi, o te Kiingitanga, ko ngaa tongikura te ritenga.
Kei teenei tuhinga te whakamaaramatanga, te whakamahukitanga o teenei taonga te tongikura. Ahakoa, inaa raa ngaa tini tongikura o te Kiingitanga kua tongikuratia ko taa teenei tuhinga whakapae he tuuhura i ngaa kura huna e whakapaetia nei, he oranga kei roto i ngaa tongikura hei painga moo te tangata. Noo te orokohanganga mai o te Kiingitanga tatuu iho raa ki teenei rangi tonu kei ngeenei tongikura ngaa kupu taurangi, ngaa tohutohu nui aa te raangai upoko ariki o te Kiingitanga ki ngaa iwi. I roto i te whakapaparanga o te Kiingitanga kua kitea taatou i te nui o te whakamahinga o ngaa tongikura hei aarahi, hei takitaki i a taatou a Tainui waka, i a Tainui tangata.
Kua haoria ake raa ko ngeetehi kohinga tongikura hei whewheratanga maaku i roto i teenei tuhinga e kite ai taatou i te mauri ora o ngaa tongikura ki roto i te iwi o Waikato, ki roto anoo hoki i ngaa iwi o te Kiingitanga. E haangai mai ana ngeenei tongikura ki te ora o te iwi, e purutia ana hoki hei kura waananga maa ngaa reanga whakatupuranga o te inamata, ki te anamata. Tiikina ake raa ko te kupu wairua, kia tuu te tongikura, ko te aakinga te mea nui, tau ki runga ki teenei tuhikura. Haere, tomokia mai te whare tongikura, he tongi takapou kura, he kura takapou roa.
Publisher
The University of Waikato
Rights
All items in Research Commons are provided for private study and research purposes and are protected by copyright with all rights reserved unless otherwise indicated.
