Abstract
Ko Pūtauaki te maunga
Ko Rangitāiki te awa
Ko Hekerangi te papa whenua
Ko Tuteao te marae
Ko Ngā Maihi te hapū
Ko Ngāti Awa te iwi
Ko Mataatua te waka
Tihe mauri-ora
Ko tōku kāwai rangatira tēnei. E mōhio ai te tangata ko wai ahau; nō hea ahau, nā wai hoki ahau. Ā, nā whai anō taku urupounamu, ko wai a Ngā Maihi o Tuteao? E mea ana ngā pākeke, he iwi tawhito a Ngā Maihi i heke mai i ngā tātai whakapapa o Tangaroa, o Pōtiki, o Mahutapoanui, o Toroa, o Tuteao. Hēoi, kua kore e rangona ōna kōrero i runga marae ātea. Kua kore e wānangahia i roto i te poho o te whare o Tuteao. Kua ngū ngā poupou o te whare kōrero. Ka mutu, i roto i ngā tau tata nei kua riro tītapu ngā puna o te kī, ngā whītiki o te kupu, o te hapū; kua kore e rangona ngā kōrero o Ngā Maihi i runga marae ātea. Ko te haumate o te reo i runga o Tuteao tētahi take i pēnei ai. Nō reira, kai te imu te ruhi, kai te imu te ngēngē. E noho pōhara ana a Ngā Maihi ki ngā tāonga o tōna whare kōrero. Hei te tau 2027, ka whakanuia te rautau o te whare tīpuna a Tuteao, ā i tēnei tau tonu 2022, e whai whakaaro ana te hapū ki taua kaupapa otirā ki te hanga whare tīpuna hou; he whare kaitā e uru ai te tokomaha. Nō reira, e whakaaro ana hoki ki ngā kōrero ka whakairohia ki ngā pakitara o te whare. I tēnei tau hoki kua mana te whakaako i ngā kōrero hītori o te Māori i roto i ngā kura, nō reira he aha rā ngā kōrero e wātea ana ki ngā tamariki o ngā kura e pā ana ki a Ngā Maihi? He maramara, he kongakonga, he putunga kōrero e noho marara ana i ngā wāhi tūmatanui. He uaua te kitea o ētahi atu, kei ngā wāhi tūmataiti, pēnei i te Kōti Whenua Māori, i ngā tuhinga ā-whānau, kei ngā pukapuka wānanga o te marae. Nō reira, he uaua te kite atu i tōna whānuitanga, i tōna hohonutanga. Tīmata ake i ngā kohinga kōrero o te hapū tonu o Ngā Maihi, i ōna kaumātua, i ōna wānanga, i ōna whānau. I tua atu i wā te whare pukapuka, kei ngā wāhi tūmataiti ētahi putunga kōrero hei ō mo te whare kōrero o Ngā Maihi o Tuteao. Ka mutu, kei ngā waiata, ngā haka, ngā mōteatea. Kai ngā kōrero hoki o iwi kē, e pā ana ki wō mātou tīpuna. I reira i tōtō mai i te kōrero.
Publisher
The University of Waikato
Rights
All items in Research Commons are provided for private study and research purposes and are protected by copyright with all rights reserved unless otherwise indicated.
