Ko te tāhuhu o tēnei whare rangahau ko te toiora o te tangata. Ko te tūāpapa o te whare, ko te reo Māori. E toru ngā pou tūhono i te tāhuhu ki te papa, mō tēnei rangahau ko aua pou ko te oranga wairua, ko te oranga whānau, ko te oranga tinana. Ko tā tēnei rangahau he āta mātai i aua pou e toru e toko ana i te toiora o te tangata, ā, kia mātai hoki i te hononga o te reo Māori ki aua pou e toru me te toiora tangata.
Ko te pātai matua kei te aroaro o tēnei rangahau ko tēnei : He aha ngā hua o te ako i te reo Māori hei reo tuarua mō te hunga pakeke ake i te tekau mā waru tau?
E toru ngā wāhanga o te pātai matua:
1. He aha ngā hua ā-wairua?
2. He aha ngā hua ā-whānau?
3. He aha ngā hua ā-tinana?
E toru hoki ngā huarahi i whāia ai kia rapua he whakautu ki aua pātai. Tuatahi ake, i tirohia ngā mātātuhi maha e hāngai ana ki te toiora tangata (Upoko tuarua), arā, ko ngā kōrero a ngā mātanga o te ao whānui, o te ao Māori hoki kua whakawhārikitia kētia ki runga i tēnei kaupapa. Ka rua, i tīmata āku ake ketuketunga ki tētahi pākiki ā-ipurangi, ā, i tukuna atu tēnā ki te marea kia whai māramatanga mō ngā momo pānga a te reo Māori ki a rātou (Upoko tuatoru). Ka mutu, i uiuitia tokorima ngā tāngata kia rongo ai i ō rātou wheako ako i te reo me ngā hua i puta mai ki a rātou (Upoko tuawhā).
E ai ki te hunga i whai wāhi mai ki tēnei rangahau ko te hua nui o te reo Māori ko te whai hononga ki te ao Māori me te tuakiri Māori. I puta mai tēnei kōrero i roto i te pākiki me ngā uiuinga. He mātotoru ngā kōrero a te hunga nei mō te kimi i te mea ngaro, ā, mā te ako i te reo Māori i kitea te mea i te ngaro, anō nei i whakakīkīngia tētahi rua ki roto i te tangata. I roto i te pākiki me ngā uiuinga i kumea mai ai i te hunga nei ngā kōrero mō ō rātou oranga i mua i te ako i te reo, i te tīmatanga o te ako i te reo, me te nāianei hoki, ā, he mārakerake noa te kitea he hoa haere te whanaketanga o te reo Māori me te whanaketanga o te taha Māori o te tangata me tōna māramatanga ki a ia anō, ā, mā reira e piki ai he taha toiora o te tangata. I tua atu i wēnei hua, he maha kē atu ngā hua o te reo i puta mai ai i te rangahau nei, ko te whai hononga ki te taiao, ki te whakapapa, ko te whakapiki māia, ā, ko te whai mahi hoki ētahi o ngā hua i tino kitea i roto i ngā whakautu a tēnei hunga.
