Mai i te Papakuratanga o Mataoho tae noa ki tona Ipu. Mai i Pukaki Tapu o Poutiikeka ki Te Puketapapatanga a Hape. Mai i te tahuna o Torea i nga wai o Mokoia, mawhiti atu ki Te Arapueru e karekare mai na ko Te Manukanuka a Hoturoa, kei reira a Taramainuku raua ko Kaiwhare. Ka kawea ki nga.hau o Mangere, e topa ai taku manuhokahoka ki Te Manurewatanga a Tamapahore. Whakaterawhiti taku haere ki Otara-a-nuku, ki Otara-a-rangi koia te tikapatanga o toku tiipuna o Marutuahu. Hoki whenei mai au ki Te Pane o Mataoho, tiro kau ake au ki aku pa whakairo ko Matatukutureia, ko Matukurua nga nohoanga tapu o Huakaiwaka, o Nga Tini-o-toitehuatahi, o Maruiwi kua ngaro katoa ki te reinga.