I roto i ngā kaupapa whakaora i te reo Māori kei te waipukehia tātou e te reo Pākehā. Ahakoa he aha te kaupapa kei te mate tonu te reo Māori, ā kāore anō tātou kia kite kei hea te ara tika hei karo atu i te korokoro o te parata. Kāore hoki tātou e titiro me pēhea e whakarekareka ai te reo ki te huhua o ngā Māori, tuatahi; tuarua ki te motu whānui. Ko te āhua nei ko tātou tonu kei te patu i tō tātou reo. He tere nō tātou ki te whakahāwea i ngā tūmomo kaupapa whakaora reo Māori. Kei ngā ngutu noa iho te mate nui ki te reo Māori. Ka ara mai he kaupapa whakaora reo, arā kē te tokomaha o ngā tāngata e patu ana i taua kaupapa. Ahakoa ko wai, kāore tētahi kaupapa e noho tapu ana. Katoa kei te tātāhia e tātou tonu. Nō reira, me aha? Me tuku kia mate? Me pēhea te patu i te korokoro o te parata mehemea ko tātou tonu taua taniwha?