E tika ana kia punarua te wānanga i ēnei pātere e rua nā te mea he mārama te kite iho o whatu he ōrite ētahi o ngā rārangi kupu, ngā whakaaro me ngā kareāroto ki te pātere a Ahumai. Ahakoa kāore i te takoto te ingoa o te kaitito i tēnei pātere, nā te ōrite o ētahi o ngā kupu, e taea te whakapae, nā te ringa kotahi ēnei pātere i waituhi? Kai roto hoki i te pātere nei e takaoto ana ngā rohe o Raukawa pērā i Wharepūhunga, me ngā tangata whai mana o tērā iwi pērā i a Tīkao. Hei taituarā ka hahua ake anō te kōrero a Turanga Te Mauparaoa ki te tata o te rohe o te iwi nāna te waiata nei, ki tōna rohe. Kāore te Māori e kī ‘nō tua ake nei tēnei pātere’ mēnā he tawhiti atu te iwi i tōna. Nō reira, ki taku wānanga, ehara tēnei pātere nō ngā iwi o Taranaki. He tawhiti rawa a Taranaki i Murupara. Hāunga a Raukawa, koia te iwi kai ‘tua ake nei’. E tuku ana ahau i taku ihu kia puta. Ki te tapahia mai, e pai ana. E kī ana hoki au, ko te mea poto te titonga tuatahi, ko te mea roa te titonga o muri mai. He ariā te mea tuatahi nō te mea tuarua.