Te Kāuta

Abstract

He rite tonu tā mātou hokihoki ki te take o Pirongia maunga, ki te tutungi i te ahi kā i Pūrekireki Marae. Ia wā ka hoki mātou ki tēnei o ngā marae, ka hīkaka taku ngākau, i te mea, ko taku mahi i reira, he tiaki ahi. Ao noa, pō noa, ko au te kaiwhakatutungi i te ahi o te kāuta, kei kewa. Ko te ahi o te kāuta o Pūrekireki marae, he ahi nui, he ahi kaitā. E ono tāngata pea ka uru ki te rua o te ahi nei. Nō reira, ko taku mahi i te rā, he kohi rākau i waho, he tapahi wahie, he whakamaroke anō hoki i te wahie, inā mākū i te ua. I ngā pō, kia hoki rā anō te iwi ki te moe, ko tāku, he noho ki roto i te kāuta me te tutungi ahi, kia wera tonu ai te wai mō āpōpō. Kei pōhēhē mai, he mahi mokemoke tēnei! Ehara! Ia pō, ka noho mai aku kuia ki taku taha ki te pahupahu. He nui ngā akoranga me ngā mātauranga i tuku iho mai ki a au i roto i tērā kāuta, i te taha o tērā ahi. Me uaua ka kitea tēnei momo ahi kaitā i ngā marae i ēnei rā. Kāore e whakaaengia ana e ngā ture Pākehā ngā ahi kaitā, pēnei nei te rahi, i roto i ngā kāuta o ngā marae; ‘Health and Safety Standards’ tā rātou i whakatau ai. Nō reira, i karangangia e taku pāpā tētehi hui ki te marae kia wānangahia te whakahōutanga o tō mātou kāuta. Nō taku rongotanga ake i te kaupapa o tēnei hui, ka tangi taku ngākau ki tō mātou kāuta. Nō reira, i whakarite ahau kia haere i tana taha.