He kohikohinga kōrero nō Ngāti Kuia

Abstract

Ko te tikanga o tēnei mahi rangahau kia whakautu i te pātai e whai ake nei. He aha ngā kōrero-ā-waha, ngā kōrero i roto i ngā pukapuka hoki ka pūmau tonu i ēnei rā mō ngā uri o Ngāti Kuia mō ngā tau kei te heke mai?

Ko tēnei he kohikohinga nō ngā kōrero o Ngāti Kuia tētahi iwi e noho ana i te Tauihu o te Waka-o-Māui. Ētahi o ngā iwi Māori he maha ngā kōrero e pā ana ki a rātou, engari ko tēnei te pukapuka tuatahi tonu ka tāia e pā ana ki a Ngāti Kuia. Ehara tēnei i te titiro hōhonu, te titiro whānui rānei i ngā kōrero engari he kohikohinga noa iho nō ngā kōrero mō Ngāti Kuia ki roto te pukapuka kotahi. Nā reira, ki te hiahia tētahi kia whāia tēnei huarahi, koinei he tīmatanga, he paku āwhina hoki mōna.

Ka āhua toru ngā wehenga o te kōrero nei. Ka tīmata i te kupu whakataki, i muri iho ko ngā āhuatanga o te mahi, arā, i pēhea ngā kōrero i kohikohia, ā, ko te whakapapa me ngā tūhonohononga o Ngāti Kuia ki ētahi atu iwi. Ko te wāhanga tuarua, ko te kōrero o nehe rā, arā, ko ngā kōrero mō ngā atua a Tāwhaki rāua ko Māui, he kōrero mō Kupe, he whakataukī, he kōrero hoki mō ngā taniwha o te iwi. Nā, ko te wāhanga tuatoru e pā ana ki ngā tāngata rongonui o Ngāti Kuia, arā, ko Tūtepourangi, ko Tamairangi, ko Hinepoupou, ko Waikura, ko Kehaia.