Mai anō, mai anō kua whakapaoho te iwi Māori, tīmata mai ai i te mahi whaikōrero, i te mahi karanga, i te mahi taonga puoro, i te mahi toi, me te mahi waiata. Ko ngā mahi nei he huarahi tuku karere i tētahi takitahi, takitini rānei ki tētahi takitahi, takitini rānei. Mā ēnei mahi e whakawhitiwhiti mōhiohio ai te tangata. Nō te taitanga mai a te Pākehā kua whai huarahi whakapaoho atu anō te iwi Māori i ō rātau mōhiohio, tīmata ana mai i ngā niu pepa, eke ana rā ki ngā reo irirangi, tae noa mai ki te pouaka whakaata me te ipurangi. Ko te rangahautanga nei ka titiro ki tētahi o ngā huarahi mātāmuri e whakapaohotia ai ngā mōhiohio a te Māori, arā te pouaka whakaata. Ka arotaketia ngā mahi tuari mōhiohio a te whare waihanga hōtaka pouaka whakaata nei a Whakaata Māori mā tētahi anga tātai e kīia nei ko Te Mata Ono. I ngā tau 15 kua pahure ake nei ehara i te mea kua tū a Whakaata Māori hai kaitohatoha mōhiohio Māori, engari hai kaiwhakarauora hoki i te reo Māori me ngā tikanga Māori. I te tuhinga roa nei ka tirohia ngā huarahi taketake me ngā huarahi hōu o te whakapaoho i ngā mōhiohio o te tangata mā roto i a Whakaata Māori. Mā te whakauruuru i ngā huarahi e rua nei e whakahōuhia ai te ara, e whakapaoho Māoritia ai hoki ngā hōtaka o te wā. E ono katoa ngā āhuatanga o te anga e kōrerotia nei. Ko te tuhinga roa nei he haurua o te anga. Nā ngā ture ā-kupu o te tohu paerua nei, ka rangahaua rētōtia e a au ngā wāhanga e toru o te ono e kīia nei ko Te Mata Ako, Te Mata Tikanga, Te Mata Iwi anō hoki. E tuhia ana hoki tētahi atu tuhinga roa i te wā nei e Kimiora Kaire-Melbourne. Kai te titiro ia ki ērā atu wāhanga e toru o te anga, Te Mata Māori, Te Mata Pākehā me Te Mata ō-Tua. Hai te mutunga o ngā tuhinga roa e rua nei, ka whakapiria ai ngā āhuatanga e ono kia waihanga pūmautia ai te anga tātari o Te Mata Ono. Ka piri ana te anga tātari ko te whāinga kia whakahāngaitia ai ki a Whakaata Māori hai tautoko, hai hāpai, hai ārahi hoki i te teihanga ki ngā rā kai te heke mai.