Te kiri ka tōkia e te anu: Ko ētahi āhuatanga ki ngā kāinga o Hiruhārama me Te Horo

Abstract

He mea waihanga e ahau, tēnei tuhituhinga, i runga i tēnei whakaaro, kia tirohia te hanga, me te āhua o te tangihanga, ki ōku marae e rua, o roto o Ngāti Porou, kei Hiruhārama me Te Horo. Kāore i whāia he wāhanga ki ngā pūtakenga mai o ngā tikanga. Engari, he mea tātaki haere noa iho ko ngā kaupapa tauira o ēnei tikanga. He mea raranga anō ngā kōrero nei, kia whiri ai i roto i ngā tauira kōrero nei, te tūpāpaku, te marae, ngā tāngata me ngā tikanga, e pā ana ki a rātau katoa. Ahakoa te nui, te huhua noa iho, o ngā tuhituhinga mō te āhua ki tēnei mea, ki te marae, te whaikōrero, te tangihanga, ēnei mea katoa, kore rawa anō nei, tētahi paku tuhituhi kua whakatakotoria i tēnei hanga nei. Ehara hoki tēnei i te tuhituhinga e whai ana i te āhua o ērā o mua atu. He mea kohikohi ēnei kōrero, nā ētahi kuia, me ētahi kaumātua, me ngā mea pakeke o tōku nei rohe, ā, he aronga nui nāku ki ngā mea i kite ai au i ngā wā i ahau i te kāinga, me ngā hui i tae ai au mai anō i tōku tamarikitanga. Nō reira, he whakapūteatanga ēnei mea katoa, nō ngā mea katoa i runga ake nei. Kua wehewehengia ēnei kōrero kia takoto pēnei ana nā: ko te wāhanga tuatahi, ko te takenga mai o Ngāti Porou, me ngā wehewehenga mai o ngā hapū; ko te wāhanga tuarua, e pā ana ki ngā whakamārama o ngā kupu, arā, te kirimate, te paemate, me te wharemate; tuatoru, ko te whakahoki o te tūpāpaku; tuawhā, kei ngā mahi ki runga i te marae; tuarima, ngā tikanga o te rā nehu; tuaono, ngā mahi whakatutuki. Hei whakamutu ake, kua whakarārangitia e ahau, ngā roherohenga mahi, me ngā tūranga e rite ana mō tēnā, mō tēnā, mō tēnā.