Te whakatere waka hourua

Abstract

Ko te whakaaturanga i te mahi whakatere waka hourua te kaupapa o tēnei tuhinga roa. I roto i te ruangahurutanga o ngā tau kua pahure ake nei he waka hourua kua hangaia i runga i ngā tauira tawhito. Ko ērā ētehi kaumoana ka akongia ngā mahi whakatere waka kia aratakina ai aua waka i runga anō i ngā tohutohu a te taiao anake. I pēnei ai hei whakaora mai anō ngā mātauranga Māori e pā ana ki te whakawhiti moana nui mā runga waka hourua. Arā rā tētehi rerenga o te waka hourua nō Aotearoa, ko Te Aurere, i te tau 1995. I wehe te waka whakahirahira nei i Hawai'i, i te 1 o Pipiri, ā, i ū rawa atu ki Rarotonga i te 30 o Pipiri. Ko te kaituhi nei tētehi o ngā kaumoana o runga. Nō reira, he wāhanga nui i roto i te tuhinga roa nei, hei tiro i te mahi whakatere waka hourua i mahingia i taua rerenga moana a Te Aurere. Hei whakaatu i te mahi whakatere waka hourua ka whakawehengia kia rima ngā kaupapa nui. He whakatakoto huarahi kia tere ai te waka o te kaipānui i te mahoranui o te tuhinga roa nei. Tuatahi. He wehe i te tauranga, he peka atu ki te whanga o ngā pukapuka. He utanga ki reira e whakamārama ana i ngā whakapae, i ngā tautohetohe, i ngā whakahē, i ngā whakaae, kua tuhia, kua tāngia ki te pukapuka, kua whakaputaina ki te ao whānui. Tuarua. He whai i ngā tapuwae o ngā waka hourua kua whakawhiti i ngā moana nui i te ao hou nei. Kua whakarārangitia noa ngā rerenga nei, kia kite ai te kaipānui i rere mā whea ngā waka hourua, i ēnei tau ruangahuru tata nei. Tuatoru. Ka whakaritea te waka o te kaipānui mō te whakawhitinga nui. Ka wānangangia ētehi tikanga a te mahi whakatere waka hourua, i te ao hou nei. He ara kia māmā mai ai ngā kōrero i te wāhanga e whai mai ana. Tuawhā. Ka rere ngātahi mai i te taha o Te Aurere, i āna whakawhitinga mai i Hawai'i tae rawa atu ai ki tōna ūnga, ki Rarotonga. He tātaritanga i taua rerenga i takahia ai i te tau 1995. Ka kitea i pēwhea te mahi whakatere waka. Tuarima. Ka hoki kōmuri mai ki te tōpū o ngā whakaaro, ki te whakarāpopototanga o ngā kōrero, ki te whītiki o ngā kī, e whakamārama ana i ngā whakaponotanga i puta nā te tirohanga ki te mahi whakatere waka hourua.