“Te Whare o te Kahikatoa, Te Iho o te Maire, Te Pōkaitāniwhaniwha o te Kohu” (TKPOT, 2010-2016).¹ Ka hoki nei kia Te Maunga rāua ko Hinepukohurangi, ki te taetanga mai hoki o Mataatua waka², ko ngā kura o tawhito, kura wānanga, kura parawhakawai o te iwi o Tūhoe ngā tino whare whakapakari pōkaitāniwhaniwha mō roto i te whare o te kahikatoa. Īnā te rahi o ngā toataumatarau i puta ngā ihu, ka tū rātau hai toa rangatira ārahi i te iwi. Ki te kore ēneki kura o te nehenehe kāre he oranga, kāre e eke te iwi ngā whakairinga tūmanako e wawatatia ana e rātau. Waihoki, ko te kaupapa e rangahau ana i tēnei tuhinga he whakapono, he whakapae, kai konei tonu tēnei hua o te wānanga. He kura hai whakapakari rangatira mō āpōpō. Ahakoa tēnei ao hurihuri koinei tonu tētahi huarahi nā te Māori, nā Tūhoe hai whakaohooho mā ngā uri whakaheke, e mau pū ai a Ngāi Tūhoe ki ōna kura tapu o nehe.